5 سطور

شهر بعيد عن الكتابة،النت كان فاصل فيهم،و حصلت احداث كتيرة اوى فى الشهر ده بحيث قررت ان اجمع كل الاحداث فى مقالة طويلة علشان متضيع احداث جديدة

=>السطور الإعلامية

1-الراقصة

طبعا كلنا لاحظنا مهزلة قناة الراقصة،سواء سماح طارق نور بعرض البرنامج،او سؤاله الأهبل علشان يضرب 5 جنيه من كل واحد،بس بالنسبة لى للاسف عنده حق،لان لو قررنا نقفل برنامج سافل زى الراقصة،مش الأولى ان احنا نقفل قنوات الرقص الشعبى و الاغانى الهابطة و نحط قوانين حازمة للجان الرقابية على الاعمال الفنية؟؟؟

2-الحيادية الإعلامية

مبدئياً انا مش بتابع اى برنامج سياسى (الا الحدث المصرى)،و بعرف الاخبار من تويتر او نبض او شريط الاخبار بالقنوات،و اسباب انى مش بتابع البرامج السياسية

أ-اغلب الإعلاميين بيأفوروا

ب-اغلب الإعلاميين عايز يوصل فكرة معينة سواء صح او غلط مش فارقة معاه المهم انه يوصلها

ج-لأنى بتهم أغلب الإعلاميين بقتل الشباب فى الفترة بين 25/يناير/2011 لحد الفترة التى تسبق حكم مرسى (فترة حكم المجلس العسكرى)،لأنهم حمسوا و شجعوا الشباب ضد المجلس العسكرى،و نجحوا بإثارة غضب الشباب و عملوا مظاهرات ضد العسكر (كان اسم الجيش فى الفترة دى اسمه عسكر و اللى قال الاسم ده اغلب الاعلاميين)،و هنا دخل طرف تالت وسط الشباب و ضرب نار و حصلت المجزرة.

=>السطور الاقتصادية

1-علاج فيروس C

فى خبر اتنشر عن نية شراء ادوية لعلاج فيروس C،سؤال هو فين الاختراع اللى بيعالج المرض ده؟؟؟

اصل كده فى حد هيتعدم،يا وزير الصحة لتبديد اموال الدولة،يا كل المخترعين مع المؤبد لكل المذيعين اللى طبلوا للجهاز

2- ͌ 64 مليار جنيه

الحمد لله عرفنا نجمع ما يقارب من 64 مليار جنيه لمشروع قناة السويس،و الحمد لله الاخوان متضايقين اوى،عرفت من ويكبيديا (نسبة التحقق من صدق الموقع 75%)انه هيتم حفر 3 انفاق تحت القناة ببورسعيد و 4 بالاسماعيلية،و لكل واحد بيقول ان المشروع بيخدم إسرائيل،طب هو ليه المشروع هيقفل الباب فى مشروع خط سكك حديد اسرائيلى يربط الاحمر بالمتوسط و أعلن عن هذا المشروع عام 2013 و المتوقع انه سيستغرق 5 اعوام لتنفيذه؟؟؟

=>شوية سطور فشخرة (اذا سمحتم)

1- adobe photoshop CC 14.2

فى مفاجاة من العيار الثقيل للإخوان(عجبانى اوى الجملة دى)،سمت شركة adobe اخر نسخة من برنامجها المشهور photo shop بإسم CC

هو انا ليا خبرة بسيطة فيه، بس لو عايزنى اعملك صورة بلغينى فيس او تويتر

انا عملت الصورتين دول

2-احمد موسى

التغريدات بتاعت #هشتغل_ناشط_سياسى اتنشر منها على برنامج احمد 12 تغريدة ل 11 شخص،و دى تغريدتى

بعد 24 ساعة من نشر التغريدة على التلفيزيون اكونتى مش عارف ارد او اعمل ريتويت،طلع ان فى حد اقصى 2400 تغريدة او ريتويت فى اليوم،كنت فاكره هجوم و لهذا شكرا لكل من ساعدنى

=>السطور الهندسية

1-يوم المهندس

افتتح المهندس/إبراهيم محلب (رئيس الوزراء) بقاعة المؤتمرات يوم المهندس المصرى، و ذلك يوم 10/سبتمبر/2014،طبعا كان فى مشاريع التخرج للطلبة،و منها مشروع لجامعة بورسعيد عن كوبرى بيتفتح و يقفل فوق قناة السويس الجديدة بإذن الله،ده كتاب المشاريع (انصح بعدم تنزيله الا للمختصين او فى اخر سنتين من الكلية) 

2-وادى السيليكون

هل تعلم ان رمال سيناء هى بوابة المستقبل التكنولوجى المصرى؟؟،لأنها أكثر الرمال نقاءً،بس نعمل مصنع لانتاج السيليكون و الشرائح الإلكترونية، و نعرف ننافس المنتجات الأجنبية بتفوق،و بكده نحقق نهضة صناعية (مش نهضة مرسى)

=>السطور الفكرية

1-التعليم

لاحظت منهج ابتدائى،و اعترف انه متغير عن الحفظ اللى كنت باخده،و كمان اسلوب الابحاث العلمية فكرة حلوة،استمروا بتطوير عقل الطفل

2-الثانوية

أختلف مع الرئيس/السيسى فى حوار دروس الخصوصية،هل تعلم ان الدرس وصل عندنا فى السويس 200 جنيه فى الشهر،يا ريس فى تماسيح مش بتشرح فى المدرسة بس بتشرح فى الدروس

3-الأزهر

أطالب بتطوير منهج الأزهر،مع مواجهة الغش بطرق عبقرية فى كل الامتحانات

4-منع الشات

انا أتفق مع شيخ الأزهر فى منع الدردشة مع الجنس الأخر إلا لضرورة قصوى او فى حدود معينة،لانى بتحدث مع اشخاص اعتبرهم عائلتى دردشة فى حدود الإحترام لإيمانى ان كل كلمة هقولها هتحدد مصيرى سواء فى الدنيا او الأخرة،و بكل تأكيد أنا ضد إهانة رمز من رموز مصر و هو شيخ الأزهر او الشيوخ الحقيقين المتخرجين منه

=>السطور الإنسانية

1-اصدقاء و متبلكين

شكرا لكل شخص سأل عنى او بيدعيلى بالخير،و اعتذر لكل شخص لم اتواصل معاه بفترة طويلة،و فى النهاية لكل شخص عاملته كأنه صديق محترم و عملى بلوك من دون اسباب احب اقوله فى دعوة دعيتها عليك لو عرفتها هتندم

2-بلوك بالحياة

لو افتكرت ان فى صديق جدع معاك،و الايام اثبتت انه نص كم حقك ترزعه بلوك،لكن لو كان فى الحياة شخص بالمواصفات دى و باعك،استعذ بالله من الشيطان الرجيم و عامل الشخص ده بحقارة بتصرفاتك و نظراتك و تجاهلك