اتجوزى سرطان

هذه المقالة كتبت بسبب مقالة نشرت على اليوم السابع بعنوان (5 اسباب تشجعك للزواج من مواليد برج السرطان) يوم 17/اكتوبر

لازم اكتب ملحوظة هذا المقال به شرح لصفاتى لكن بطريقة كوميدية و من تعامل معى لفترة فسيفهم قصدى،وبخصوص بنات هندسة فهن ملكات بعقلهن لكن انا احب ان اهزر مع البشمهندسات الذين هن فى مكانة عائلتى.

كانت الأسباب التى ذكرها مقال اليوم السابع للزواج من ذكر السرطان:

1-رومانسى و هيجيبلك ورد

2-مستمع جيد..ارغى براحتك

3-السرطان حنين

4-قدمى السبت و هتلاقى الحد

5-سرك فى بير

و طبعا ده مقال راقى و فيه تعزيز لمكانتى (كذكر للسرطان)،و علشان كده قررت اثبتلكم صحة المقال

1-رومانسى و هيجيبلك ورد

علشان انا طالب فى هندسة،فى قسم أقل ما فيه ان الاساطيربتقول عنه(إذا كانت الميكانيكا محمية الذكور فكهربا تجنيد للإناث)،فطبيعى اى فتاة بره الهندسة و طب لازم اكون رومانسى معاها،و بخصوص الورد نظرا للحالة الإقتصادية فغالبا اول جنينة هاخد منها وردتين و ابعتهالها

2-مستمع جيد،ارغى براحتك (يا خسارة فاتتنى ديه فى كيف تتعامل مع المرأة)

طبعاً فى هندسة الدكاترة بتشرح بالساعتين و التلاتة،و احنا ماسكين الموبايل من تحت البنش،الا اول 3 بنشات،و انا كذكر السرطان بقعد فى تانى بنش (اللهم زدنى تواضعا)

3-السرطان حنين

كلام جميل و كلام معقول مقدرش اقول حاجة عنه،و لكن يا صديقى انا فى هندسة و سر جمال أنثى الهندسة هو ....... و لا بلاش،فأكيد لازم اتميز بالرقة و الحنية مع الفتيات لأن دول كائنات نادرة بالنسبة لنا

4-قدمى السبت و هتلاقى الحد

عن نفسى كذكر سرطان،قدمى طبق كشرى او مكرونة بشاميل وهتلاقى اكتر من الحد

5-سرك فى بير

انا كمهندس مؤيد للسنجلة،فلما أقرا الجملة دى لازم اقول:حاسس بمصيبة جايلى،مش كفاية الهندسة،حرام عليكم عايزين تجوزنى وانا لسه متخرجتش

Read More

فن التعامل مع الجنس الأخر ج2

المقال ده كوميدى،هدفه الواضح الهزار،بس هدفه الحقيقى توضيح سبب المشاكل بين الزوج و الزوجة،فى ناس اتضايقت لما كتبت (كيف تتعامل مع المرأة؟)و قالوا ان التعامل لازم يكون بإحترام،ده هكتبه أدام فى مقالات بس مش كوميدية

--------------------------------------------------------

كيف تتعاملين مع الرجال؟

حتى تتعاملين مع الرجال،عليكى ان تدركى حقيقة هامة و هى إعتزازه بكبريائه،يعنى يا برنسيسة خلى بالك من غضبه

1-الخروج مع أصحابه (بقلم/شمس الضحى)
الراجل من دول بيبقى قاعد على القهوة و لا بيتفسح مع أصحابه،و يرجع البيت يتأمر،و لو الواحدة تعبانة و طلعان روحها من الطبيخ و الغسيل و ولاده و طلباتهم اللى مبتنتهيش،و لو قالت تعبانة يا داهية دقى يصرخ بصوت عالى زى الأسد البنغالى (عملتى إيه يعنى؟،انا أقدر أعمل كل ده بضفر صباعى الصغير)،طيب و حياة أبوك ايدينا ضفرك اخلص الشغل و ارجعهولك.

2-كازانوفا فى الزواج(فكرة داندروما)
الواد و هو ناوى يتجوز،يقوم يضرب من الحج 10 جنيه يقص شعره و دقنه و ياخد منه 75 قرش يشترى بيه كيس جل بربع جنيه و ريحة لولوا بالباقى،و يسمى الله و يخش يشوف العروسة اللى أهله اختاروها له،و التعليقات بتكون(لأ دى شبه نجلاء فتحى مفيش منها هيفاء،دي عيونها فستقى عايز منها عسلى)،النوعية دى لو قابلتيها ردى عليه و قولى(على اساس انك توم كروز،ده انت يا حيلتها حاطط كيس ريحة لولوا بنص جنيه)

3-الراجل بينادى الست بالغفيرة(من تعاملاتى مع جروب العائلة على الواتس اب)
بعد كام سنة زواج،الجسم بيقل جماله،وقتها زوجك بيناديك بدل (حبيبة قلبى) إلى (الغفير راح الغفير جه و أحياناً الشاويش عطية)،و طبعا فى الكليات مقوليكيش،معظم البنات بالنسبة للشباب غفر،علشان تتعاملى مع النوعية دى لازم تجمدى قلبك و إيديك،و ارزعيه قفا جامد و قوليله (البيه المامور عايزك)،و سلمى لصاحبتك الجامدة جدا علشان تنفخه

4-بيبوظ الشقة و مش بينضف وراه(شكرا يا داندروما)
الراجل اليومين دول بيرمى هدومه هنا،يوقع حاجات هنا،و فى الأخر ينتبه ان الشقة وسخة،يقول لمراته (ما تنضفى يا هانم)،الحل انك تركبى كاميرات مراقبة فى الشقة و تسجيليله،و يوم الخميس تعزمى مامتك و تشغلى الفيديوهات دى ادامهم،و خلى مامتك تتعامل

5-على حق حتى لو كان غلطان(من ملاحظاتى)
الولد و هو صغير يقع العيلة كلها تجرى عليه،لكن لو بنت وقعت يقولوا فوقى يا هبلة،كبروا شوية و بيركبوا عربيات لو الواد كسر إشارة عادى،لكن لو بنت كسرتها يومه يبقى مش كويس،لما اتجوزوا،لو الست سابت الرز على النار 3 ثوانى زيادة على الرز يبقى مبتعرفش تطبخ،و هنا اكتشف مركز معا لنشر الحقيقة ان 15% من الرجالة بيعرفوا يطبخوا،فدبسى زوجك فى أنه يعمل حلة رز،هيطلع اسود ومهبب

Read More