‏إظهار الرسائل ذات التسميات تحدى. إظهار كافة الرسائل
‏إظهار الرسائل ذات التسميات تحدى. إظهار كافة الرسائل

الجمعة، نوفمبر 28، 2014

#فيها_حاجة_اتغيرت



(شكر خاص لصاحب فكرة الهاشتاج)

فى ال 11 سنة اللى فاتوا (عارف ان هما المفروض 31 سنة بس علشان ندى لمبارك حق انجازاته و خصوصا ان اخطاؤه و تدخل ولاده فى مصر زادو فى اخر 10 سنين فهنمشيها 11 سنة) طلعت ريحة الياس،زى ريحة الغاز،تتخانق مع مراتك تحصل ثورة جنب بيتك،و ريس يتشال و نظام يتغير و مراتك لسه قاعدة على قلبك.

بس من اول 30/يونيو/2013 بعد ما وصلنا قادة الإخوان للسرايا الصفرا و شربناهم حاجة صفرا(علشان كده خدوا اللون الاصفر لونهم المفضل)،و بدات روايح مجارى الشارع السياسى تهدى شوية،و ابتدى وقت الشغل علشان مصر.

فيعنى فى اخر 10 سنين من بتوع مبارك،كان بيتقالى اشتغل بجد علشان تتقدم فى المناصب،مع انها كانت معروفة ان الواسطة هى اللى بتساعدك فى الترقية،اما فى عهد مرسى فمرة تيجى الترقية لمهندسين ساقطين انجليزى او لناس عندها دقن بدل العقل،بس دلوقتى فى فترة السيسى،الريس بنفسه ينزل يشجع الناس و يقابلهم،و ده السبب اللى مخلينى اشتغل علشان بلدى بجد.

اما عن الحكومة،فالبشمهندس محلب مطلع عين الوزرا اللى تحته و منزلهم فى الشارع يشوفوا شغلهم،لكن للأسف فى شوية منهم مقتنعين بمبدا مرسى فى الشرح (gas and alcohol don’t mix)،دول للأسف نقطة ضعف فى حق مصر،بس الحمد لله فى تقدم عن ال11 سنة اللى فاتت.

و السادة المحافظون ينزلوا يفتح محلات للناس اللى بتبيع على الرصيف،و فى اهتمام منهم بالنضافة بتاعت الشارع و ده تقدم حلو.

و الحمد لله على جيش بلدنا،عرفوا ازاى يكسبوا حب الناس بالإحترام.

م الاخر فكك من اى واحد اهبل بيحسسك بالياس و يقولك شوف المجارى طفحت علشان المطرة،ابتسم و اشتغل بجد علشان تخلى البلد مكان افضل لولادك و لبناتك (علشان الجنس الناعم ميزعلش)


الخميس، يوليو 10، 2014

فن التعامل مع الجنس الأخر ج2



المقال ده كوميدى،هدفه الواضح الهزار،بس هدفه الحقيقى توضيح سبب المشاكل بين الزوج و الزوجة،فى ناس اتضايقت لما كتبت (كيف تتعامل مع المرأة؟)و قالوا ان التعامل لازم يكون بإحترام،ده هكتبه أدام فى مقالات بس مش كوميدية
--------------------------------------------------------
كيف تتعاملين مع الرجال؟
حتى تتعاملين مع الرجال،عليكى ان تدركى حقيقة هامة و هى إعتزازه بكبريائه،يعنى يا برنسيسة خلى بالك من غضبه

1-الخروج مع أصحابه (بقلم/شمس الضحى)
الراجل من دول بيبقى قاعد على القهوة و لا بيتفسح مع أصحابه،و يرجع البيت يتأمر،و لو الواحدة تعبانة و طلعان روحها من الطبيخ و الغسيل و ولاده و طلباتهم اللى مبتنتهيش،و لو قالت تعبانة يا داهية دقى يصرخ بصوت عالى زى الأسد البنغالى (عملتى إيه يعنى؟،انا أقدر أعمل كل ده بضفر صباعى الصغير)،طيب و حياة أبوك ايدينا ضفرك اخلص الشغل و ارجعهولك.

 2-كازانوفا فى الزواج(فكرة داندروما)
الواد و هو ناوى يتجوز،يقوم يضرب من الحج 10 جنيه يقص شعره و دقنه و ياخد منه 75 قرش يشترى بيه كيس جل بربع جنيه و ريحة لولوا بالباقى،و يسمى الله و يخش يشوف العروسة اللى أهله اختاروها له،و التعليقات بتكون(لأ دى شبه نجلاء فتحى مفيش منها هيفاء،دي عيونها فستقى عايز منها عسلى)،النوعية دى لو قابلتيها ردى عليه و قولى(على اساس انك توم كروز،ده انت يا حيلتها حاطط كيس ريحة لولوا بنص جنيه)

 3-الراجل بينادى الست بالغفيرة(من تعاملاتى مع جروب العائلة على الواتس اب)
بعد كام سنة زواج،الجسم بيقل جماله،وقتها زوجك بيناديك بدل (حبيبة قلبى) إلى (الغفير راح الغفير جه و أحياناً الشاويش عطية)،و طبعا فى الكليات مقوليكيش،معظم البنات بالنسبة للشباب غفر،علشان تتعاملى مع النوعية دى لازم تجمدى قلبك و إيديك،و ارزعيه قفا جامد و قوليله (البيه المامور عايزك)،و سلمى لصاحبتك الجامدة جدا علشان تنفخه

 4-بيبوظ الشقة و مش بينضف وراه(شكرا يا داندروما)
الراجل اليومين دول بيرمى هدومه هنا،يوقع حاجات هنا،و فى الأخر ينتبه ان الشقة وسخة،يقول لمراته (ما تنضفى يا هانم)،الحل انك تركبى كاميرات مراقبة فى الشقة و تسجيليله،و يوم الخميس تعزمى مامتك و تشغلى الفيديوهات دى ادامهم،و خلى مامتك تتعامل

 5-على حق حتى لو كان غلطان(من ملاحظاتى)
الولد و هو صغير يقع العيلة كلها تجرى عليه،لكن لو بنت وقعت يقولوا فوقى يا هبلة،كبروا شوية و بيركبوا عربيات لو الواد كسر إشارة عادى،لكن لو بنت كسرتها يومه يبقى مش كويس،لما اتجوزوا،لو الست سابت الرز على النار 3 ثوانى زيادة على الرز يبقى مبتعرفش تطبخ،و هنا اكتشف مركز معا لنشر الحقيقة ان 15% من الرجالة بيعرفوا يطبخوا،فدبسى زوجك فى أنه يعمل حلة رز،هيطلع اسود ومهبب

الأحد، يوليو 06، 2014

المتشدقين بالوطنية

التشدق:هو اللت و العجن بالبلدى
(التحدى مقدم من ا/اشرف و ا/مريم و الحوت، التقييم من 0 إلى 10)

يوم 5/يوليو/2014 ارتفعت اسعار الوقود،و طبعا ده كان محور كلام أهل تويتر و الفيس،وقتها انقسم الكلام إلى اكتر من جزء

الجزء الأول:التطبيل فوق الحد للقانون،مع ان سبب كراهيتنا لمرسى هو التطبيل

الجزء الثانى:الأجرة زادت،و المفروض نعمل شركات مواصلات جديدة،و ده ينقلنا للجزء الثالث

الجزء الثالث:الاستثمار،و هنا سألت سؤال ليه الناس المصريين اللى معاها ملايين مبتساعدش مصر؟؟

الناس ديه تقوم تعملنا قناة بفلوسها،و تقوم إعلانات (تحيا مصر) و (علشان خاطر مصر) و (اتبرع لحساب .....) و إعلانات زى كده،بس لما تيجى تطلب منهم انهم يساعدو مصر يبقى الرد بتاعهم (انا مش عارف انا أبقى مين انا مش انا)

يا سيادة الريس،انا مش مختلف معاك بخصوص البنزين،عندك كل الحق،بس برده إيه ذنب المواطن الغلبان و انت عندك حيتانقاعدة على ملايين،و فالحة تجيب مذيعين بيقولوا (اتبرعوا علشان خاطر مصر) او (لازم نجيب الدكاترة و مهندسين البترول علشان نعرف بياخدو كام)،طب ما نجيبكم و نعرف انتوا بتهبروا كام؟؟

يا سيادة الريس،الحل كان فى التاريخ،وقت الشدة على مصر فى حكم قطز،وقتها فكر فى زيادة الضرايب،وقتها مستشاره و استاذه قال مينفعش إلا لما تاخد من الأمراء و الناس اللى فوق،و وافق قطز و قال للناس اللى فوق اتبرعوا،عملوا نفسهم من بنها،قام قفل عليهم القصر و بعت حملات امنية و رجع فلوسهم للخزانة بعد كده رفع الضرايب.

يا سيادة الريس،انت عملت حركة جدعة لما اتبرعت بنص مرتبك،بس الناس ديه للأسف اخرها تتبرع بإعلانين تلاتة و شوية فراخ،لكن يتبرعوا بفلوس و لو نص جنيه،انسى
السيسى اتبرع بنص مرتبه
اشمعنى؟؟
فاكرنا هنعمل زى ما عمل فى مرتبه
الحل يا سيادة الريس تعمل زى البورصة و تنص القانون التالى
إن من يمتلك الجنسية المصرية و يعمل داخل حدود جمهورية مصر العربية بحيث يكون مرتبه من مليون جنيه فيما فوق فإنه عليه ضريبة شهرية تقدر بـ5% مما ينال
ده اللى كان مفروض يحصل الأول،قبل ما حضرتك تنزل القرار بتاع رفع الدعم

نرجع تانى لأهل تويتر
كان فى ردود تانية 

ناس بيشتموا فى محلب و بيقولوا حكومته حكومة رجال أعمال،مش ده برده رئيس الوزراء محلب اللى كنا فرحانين بيه قبل ما يمسك السيسى؟؟؟،إيه اللى اتغير فى الحكومة؟؟ (بجد مش عارف)

بخصوص التطبيل،معاكم ان رفع الدعم ده الحل الصحيح،لكن فى سلبيات فى القرار،و بطريقتكم الرائعة فى التطبيل هتكرهوا الشباب فى السيسى،و ممكن يحس الشباب ان الفرق بين السيسى و مرسى هو حرف C

بخصوص الناس اللى بتقول إيه سبب زيادة  بنزين 95 بنسة 7%،هى ان بالفعل سعر بنزين 95 هو 625 قرش،لكن المشكلة هى غلاء بنزين 80 و السولار اللى هما عصب الحياة المصرية و المواطن الغلبان،و النتيجة السيئة للحوار زيادة اسعار الخضار و الفاكهة و اجرة الميكروباصات،بإختصار تعذيب المواطن الغلبان

بخصوص الناس اللى بتحلم بفلوس الإخوان،فى ناس بتحلم بفلوس الحزب الوطنى،و كلنا عارفين ان مش هنعرف ناخد الفلوس ديه إلا بحكم إعدام الحزبين

اخيرا فى رقم للإتصال بخصوص شكاوى إرتفاع الأسعار،يا رب ميكون زى اسطورة ديوان المظالم الفاشل اللى كان فى عهد الإخوان،يا رب يكون احسن منهم،يإلا بجد هيكون الفرق بين السيسى و مرسى C
-----------------------------------------------------------------
ملحوظة لا علاقة لها بالمقال
أنا أكتر حاجة بحبها النقاش و ان حد ينبهنى على خطأ عملته،لأن ده الوسيلة الوحيدة علشان اطور فى كتاباتى

الأحد، يونيو 29، 2014

الخونة


(هذا التحدى مقدم من الأستاذة/إيزيس المصرية، التقييم من 0 إلى 10)

فى الفترة التى تلت 25/يناير/2011،ظهر أشخاص افتكرناهم ملايكة،بس للأسف طلعوا شياطين،الحمد لله كشفناهم على حقيقتهم.

-المتدينين و ينقسموا إلى
1-المتأسلمين:
زى الإخوان المتأسلمين،داعش،و اى شخص بيستخدم الدين علشان تحليل القتل،و حاليا حزب النور،و خصوصا تصريحات برهامى اللى هتودى فى داهية قريب،بالذات موافقته على نشر (هل صليت على المسيح اليوم؟)،النتيجة الحتمية للحوار ده هو نهاية فيلم حسن و مرقص،كمصريين فاهمين الحوار ده كويس 100% و بنحاربه و فى المقدمة الأزهر الشريف،بس الغرب و امريكا بيشاوروا علي الناس دى و يقول ده الإسلام،الإسلام=إرهاب،شكرا ليكم على إهانة الإسلام.

2-بعض أقباط المهجر:
و على رأسهم موريس صادق،فكرهم متطرف زى الإخوان،مرة خطة تقسيم مصر و مرة علم مصر بس بصليب من غير نسر و اخيرا فيلم مسئ للرسول محمد صلى الله عليه و سلم،و طبعا الغرب بيقول شايفين المسيحين مضهطدين إزاى،الحمد لله ان الشعب المصرى و على رأسه البابا شنودة الثالث (الله يرحمه)،انتبه للفخ ده و رفض تدخل الغرب بإدعائهم الكاذب انهم سيحموا الأخوة المسيحين المصريين.

 3-نشطاء السبوبة:
بعيدا عن عبد الرحيم على،مشكلة النوشتاء دول انهم فاكرين انهم لسان الثورة،و ان لولاهم مكنش فى ثورة،كلام حلو و معقول و ننسى بقى الكام مليون مصرى اللى نزل معاهم،و نسسى بقى الكام مواطن مصرى اللى اتذل علشان يحسن بلده،و طبعا الغرب بيقول أين الحرية للنشطاء

4-المطبلتية
و دول يا متحلين الإذاعة و التلفزيون يا اللى هما عملوا القنوات الخاصة اللى بيقعد فيها الناس المحتلة الإذاعة و التلفزيون،فلو حضرتك تعرف مطلبتية يا ريت تقوللى،علشان بقالى مدة مش بتفرج على التلفزيون.

5-شتامين الشباب
دول مهمتهم بلا فخر شتم الشباب و إثبات ان الشباب حمار،معاك أن فى شباب غلطان،بس ملكش حق انك تشتم الشباب من غير ما تعلمه و تفهمه،و دى بالنسبة لى أسوأ مجموعة علشان بتؤكد كلمة ستيف جوبلز (وزير الإعلام النازى)
كلما سمعت كلمة إعلام تحسست المسدس الذى بجيبى

الخميس، يونيو 26، 2014

فن التعامل مع الجنس الاخر ج1

من صفحتى على الفيس

أ-كيف تتعامل مع المرأة؟؟؟
حتى تتعامل مع المرأة عليك ان تدرك حقيقة هامة:قدرتها على استشعار الخطر بسرعة فائقة
يعنى يا برنس خلى بالك من كلامك

-السن:-
إياك تسأل واحدة عن سنها،السؤال ده بيودى ورا الشمس،أما لو حبيبتك سألتك تتخيل انا عندى كام سنة،قول 25 سنة يا حبيبتى (حتى لو كانت 200 سنة)،لأنك لو قلت الحقيقة هتكتشف ان كل حاجة فى البيت سلاح نووى شامل زى شبشب الحمام و الريموت،و يا سلام لو جاوبت فى المطبخ،انت كده وقعت على شهادة وفاتك

-الوزن و الطول:-
اكتر سؤال مستفز للبنات (هو وزنك كام؟)،لو عايز تسأله لمراتك يا ريت يكون الباب (و يفضل يكون مفتوح علشان الهروب السريع)،و تتأكد أن مراتك بعيدة عنك لحد اخر الشقة،غير كده انت فى عداد الموتى،و بخصوص الطول بنقول على القصيرة اوزعة و الطويلة نخلة،مفيش حاجة للإستهلاك المحلى.

-المكياج:-
نصيحة قلبية و جيبية للشباب:اعمل حساب فى البنك بفايدة متزايدة و انت عندك 20 سنة و افضل كل شهر حط فيه فلوس،علشان لما تتجوز تعرف تصرف على مصاريف المكياج و الميك اب و الذى منه
و يا سلام لو حظك خلاك تتجوز كائن فضائى،لو عايز تشوفه بعينك على حقيقته،و هى مش واخدة بالها امسك فوطة مبلولة و ادعك وشها جامد،بس اتصل بالاسعاف و احجز سرير فى قسم العظام

-الطبخ:-
لو لسه هتتجوز جديد،نصيحة قلبية شوف مرات بتعرف تطبخ إيه و تطبخه ادامك،وقتها اتصل إحتياطى بالمطافى و الإسعاف و المحل اللى جنب البيت يعملك اكلة حلوة،لأن الدراسات الجديدة من مركز معا لنشر الحقيقة أثبتت ان 85% من الشابات أخرهم فى الطبخ البطاطس و الاسباجيتى و تقمير العيش و الاندومى

-المسلسلات:-
لو انت راجع من الشغل و شايف مراتك بتتفرج على مسلسل،إياك تكسر اندماجها بالمسلسل،هتلاقى ودنك فى خبر كان،هتشرحلك المسلسل من بداية المؤلف و هو بيجمع الممثلين لحد الحلقة اللى بتتفرج عليها بعشر حلقات،و يا سلام و هى فى عز الإندماج تقلب تتفرج على ماتش او الأخبار،هتتفرج على تحول الإنسا لمذؤب مباشر و HD و 3D،العين هتحمر و المخالب هتتطول و هاتك يا عض لحد ما تسيح دمك،حتى لو قلبت على المسلسل لازم تسيح دمك

ب-كيف تتعاملين مع الرجل؟؟؟

فى مشكلة،انا مش عارف الستات متضايقة ليه من الرجالة،بس قبل ما تسنى السكينة و تجهزى المشنقة علشانى،اكتبى مقالة اسمها (فن التعامل مع الجنس الأخر ج2)،و ابعتيها على حسابى
tagnn@outlook.com
و يجب كتابة اسم المنشن بتاع تويتر او رابط حساب الفيس
المقالة اللى هتكسب هنشرها الخميس القادم إن شاء الله الموافق 3/يوليو/2014
باقى المقالات هاخدها screen shoot و انشرها على الفيس
الحاجات اللى بهتم بيها هى الفكرة و كمية الفكاهة الحلوة و الأسلوب الكتابى
بالمرة لو ملقيتش مقالات ده اعتراف منكن ان الرجالة طيبين (انا مش مصدق الكدبة دى مش عارف ليه)

السبت، يونيو 21، 2014

نعم استطيع

(هذا التحدى مقدم من الأستاذ محمد،التقييم من 0 إلى 10)

1-الكهرباء

إيه أخر قيمة فاتورة كهربا دفعتها فى الشتا،تقريبا 30 جنيه،دلوقتى احنا فى الصيف و رمضان على الأبواب،و افتح التكيف و استمتع بس الفاتورة هتكسر حاجز ال100 جنيه و الكهربا هتتقطع

حاليا فى الفترة الصعبة دى،البلد محتاجة كل مليم يخش جيبها،للأسف احن بنضيع فلوس كتير،سواء فى الكهربا او الماية او .........

هناخد مثال كهربى 
متوسط ثمن الكيلو وات الواحد 15 قرش انت بتشتريه ب5 قروش فى فترة الصيف،يبقى الحكومة بتخسر 10 قرش فى الميجا الواحد (طبعا من غير حساب المفاقيد اللى بتضيع فى السلك)

فاتورتك=30 جنيه و ده معناه انك استهلكت 600 كيلو وات،سببت خسارة للحكومة 60 جنيه،إذا قلنا ان فى نفس العمارة فى 7 شقق غير شقتك،الخسارة ل480 جنيه،لو فى الشارع 10 عمارات.......الفكرة وصلت

مع انك لو وفرت الكهربا عن طريق ازالة اجهزة مش محتاجها من الفيشة (زى اللمض وقت الصبح) و استبدال اللمض القديمة بأخرى موفرة،قبل ما تقول غالية و 14 جنيه،ديه بتشتغل من الف الى الفين ساعة و فى حاجات ل50 الف ساعة و العصر الجديد LED هتسحب طاقة فى حدود 20 وات/ساعة،بالمرة يجب عدم كسر اللمبات الموفرة لأنها مؤذية (الLED غير قابلة للكسر)

بخصوص الفحم الفحم مش للشركات الحكومية لتوليد الطاقة الكهربائية للشبكة الأساسية،ده للشركات المولدة لكهرباء مصانع الأسمنت،و بخصوص المحطات النووية محتاجين 6 سنوات لو أتبعنا نظام الباكستان

و يفضل وضع التكييف فى درجات حرارة بين 20-25 سلزيوس،و بخصوص المحلات اللى على الرصيف،دى بقى بتسرق الكهربا ببجاحة،يا رب تفوق الحكومة ليهم

و اتحلت المشكلة فى طنطا عن طريق نظام كارت الشحن بس للكهربا

2-الماء
اعتقد ان سد اثوبيا بين 35%-40%،فيا ريت تخفف الماية شوية،و تصلح الحنفيات،و لما تغسل إيديك او تتوضى متفتحش الحنفية على الاخر

3-العيش
رجاء خاص من الاخوة الفلاحين،يا ريت متشتروش عيش ب100 جنيه علشان تعملوه علف للبهايم،المشكلة اتحلت فى السويس و محافظات القناة عن طريق كارت التموين الذكى

4-ورق هل صليت على النبى اليوم
الحاجة اللى ضايقتنى لما شفت صورة واحد صاحب محل بدل رقص شرقى حاطط الورقة دى على الهدوم و كمان شوية شباب بيتريقوا على الحوار ده عن طريق الكوميكس،بس سؤال للناس اللى بتحط الورق ده،ترضى ان اخوك المسيحي ينشر ورق مكتوب عليه (المسيح قام بالحقيقة قام)؟؟؟
عموما لو لسه مصر على النشر فافضل طريقة هى جملة (استغفر الله) او (سبحان الله)

5-البنزين
اعتقد ان الفايدة الوحيدة للعربية هى انك تلحق شغلك بدرى،غير كده يفضل السير او العجل

6-التعصب
للأسف افة مجتمعنا هى التعصب فوق الحد،مع انه الأفضل انك تحاور الجميع علشان خاطر مصر،مقصدش الإخوان و لا 6 ابريل

7-العمل:
للأسف فى ناس كتيرة مأنتخة،شكرا لقانون العمل

دى شوية مشاكل بس لازم تتحل علشان نتطور

الأربعاء، يونيو 18، 2014

التاريخ من وجهة نظر مهندس

مقدمة الاجازة

(هذا التحدى مقدم من الاستاذة/نادية التقييم من 0 الى 10)

ميزة التاريخ انه يتكرر بين هزيمة ومجد،من وجهة نظرى كمهندس فهذه أشبه بدالة جيب الزاوية (sinα)

بحيث يكون المحور الرأسى حال العنصر المراد دراسته،و المحور الأفقى هو العصور التى مر بها العنصر،و لكن دالة الجيب تدل على الدولة المثالية،فهى تبدأ من الصفر ثم تصل لأعلى مجد ثم لأسفل هزيمة و هكذا.

لكن فى الحياة الواقعية الأمر يختلف كثيراً،فمثلا نأخذ تاريخ مصر كحالة تتم دراستها (اعذرونى على جهلى ببعض العصور التى مرت على مصر)

بدأت الحضارة الفرعونية من الصفر عن طريق الزراعة و انضمام الناس إلى تكوين مجتمعات بسيطة أشبه بالقرى،حتى وحد الملك مينا القطرين و ضمهم فى مملكة واحدة مصر (مجد,قمة)،واستمر هذا المجد حتى هاجم الهكسوس على مصر (هزيمة,قاع) ثم تخلص منهم الملك احمس (مجد,قمة)

مرت العصور الرومانية و الخلافية بأنواعها (الخلفاء الراشدين،اموية،عباسية) ثم عصر المماليك ثم عصر التدخل الأجنبى،فمثلا تعتبر ثورة 1919 و ثورة عرابى محاولات لإعادة مصر لوضع الصفر حتى يتم بنائها

ثم عصر الضباط الأحرار (مجد,قمة) و تحرير مصر من براثن البريطانين و جلائهم عن مصر،و استمر فترة شعورنا بهذا النصر حتى أتت نكسة  1967 (هزيمة,قاع) و الإعداد لحرب أكتوبر 1973 (مجد,قمة)،و استمر فترة شعورنا بهذا المجد حتى وصلنا مرة أخرى إلى القاع بسبب الفساد،ثم وصلنا مجدداً إلى القمة مرة أخرى بسبب 25 يناير 2011 و إن لم يدم هذا طويلا بسبب وصول الإخوان المتأسلمين للحكم،و لكن استعدنا الحكم مرة أخرى عن طريق ثورة 30 يونيو 2013

من هنا نستنتج ان الدولة الحقيقية عن الدولة المثالية فى عدة نقاط:
·         فترة المجد تختلف من عصر إلى عصر على حسب الاتحاد و الأمل
·         فترة الهزيمة تختلف من عصر إلى عصر على حسب اليأس و الإنفصال
·         قيمة المجد تعتمد على الفرح به و الاستمرار فى العمل
·         قيمة الهزيمة تعتمد على الحزن عليه و الاستمرار فى اليأس

و من المنحنى نستطيع ان نتعلم شئ واحد اكيد و هو (الزمن يعيد نفسه)

ملحوظة:-الأستاذة نادية هى استاذة فى التاريخ (على ما أذكر كان الإسلامى)،و هى بتقدم معلومات تاريخية هامة تستحق الإهتمام و المتابعة تحت #تاريخنا_اليوم
شاركوا فى الهاشتاج و ريتويت لأصحابكم

الجمعة، مايو 16، 2014

النظرة من المنتصف

(هذا التحدى مقدم من كمل مشوارك احنا معاك (استاذى/أيمن ألماظ) أعلى درجة للتقيم 10 و اقل درجة 0)
كشاب فى جامعة،فأنا أعلم أراء الشباب،كصديق لأشخاص قد يصل سن أصغرهم إلى 29 سنة أتعامل معهم بإحترام كإحترام اخر العنقود لأسرته،فأنا أحاول أن أفهم ارائهم

إذن فأنا ذلك الشخص الذى يقع فى منتصف الفجوة بين تفكير الكبار و تفكير الشباب،و أعتقد أنه من الأفضل أن أشرح أبعاد الفجوة طبقاً لتفكيرى و منظورى كشاب 

الفجوة الدينية (سواء إسلامى أو مسيحى)
نظرة الكبار:الدين هو الإحترام فى أبسط صوره
نظرة الشباب:خانة فى البطاقة 
سبب المشكلة:الإنفتاح اللى حصل،و معرفة ثقافات غربية،و التحرر دون سيطرة الأهل على هذا النوع من التحرر
نتيجة المشكلة:ظهور الفيزون (اخر موضة للفيزون هى بنطلون البيجاما)،و ظهور ملابس نسائية يلبسها الذكور.
الحل:منع الشباب و الفتيات من النزول بمثل هذه الثياب المهينة،و الجلوس مع الأبناء يوميا و لو نص ساعة يوميا فى النقاش الدينى

الفجوة اللغوية
نظرة الكبار:اللغة هى التراث
نظرة الشباب:franko
سبب المشكلة:هو مواقع التواصل الإجتماعى،و عدم تعلم الناس الكبيرة لهذه المواقع بنفس سرعة تعلم الشباب
حل المشكلة:جلوس العائلة كل يوم و التحدث باللغة العربية الفصحى المحترمة و لو لنصف ساعة

الفجوة الغنائية و السينمائية
نظرة الكبار:المغنين اللى عاملين أنهم بتوع الشعبى دول شمامين كلة و الممثلين دلوقتى فانلة حمالات
نظرة الشباب:المدفعجية جامدين طحن و عايز أبقى زى عبده موتة
سبب المشكلة:الإنفتاح من غير سيطرة و خصوصا بعد 25 يناير 2011
نتيجة المشكلة:حدوث فجوة دينية و أخلاقية و لغوية
حل المشكلة:مناقشة الأباء لأبنائهم الذكور و الأمهات لبناتهن فى محاولة لإيقاظ النخوة

الجزء التالى سياسة،قد ترفض بعض الأراء لكونها تختلف معك فى الرأى و لكنها حقيقة عليك تقبلها فى محاولة إنقاذ مصر و تطويرها

الفجوات السياسية
أ-25 يناير 2011
نظرة الكبار:نكسة
سبب النظرة:ظهور الإخوان و النكسجية و 6 أبريل و نشطاء السبوبة السبكى و المدفعجية
نظرة الشباب:ثورة
سبب النظرة:التحرر من نظام فاسد
نظرتى الخاصة:25 يناير 2011 هى ثورة بأمر الشعب و لكن لعدم وجود قائد سيطر عليها نوعين من الناس
1-الفريق الأجنبى و يتمثلون فى الإخوان و نشطاء السبوبة و الخونة
2-الحمقى الداخليين:و يتمثلون فى شباب متحمس من غير توجيه و شوية سرسجية زى السبكى و شلته

ب-السيسى و حمدين (النظرة المحترمة)
نظرة الكبار:السيسى شخصية محترمة
سبب النظرة:أسلوب تحدثه
نظرة الشباب:حمدين مرشح الشباب
سبب النظرة:مشروعه يداعب أحلامهم

ج-السيسى و حمدين (النظرة الإستهزائية)
نظرة الكبار:حمضين
سبب النظرة:أن برنامجه ليس جاد
نظرة الشباب:أعمل مناظرة مع حمدين يا مشير زيزى
سبب النظرة:أن المشير طلب من الجميع شد الحزام،مع العلم ان سبب الفساد السابق هو شد الحزام على بطون المواطنين البسطاء و ليس على كبار رجال الدولة

نظرتى الخاصة:أن السيسى شخصية محترمة،و السبب الذى يدفعنى لقبول مناظرة بينه و بين حمدين هو توضيح تفاهة حمدين للشباب المؤيد له،اما بخصوص الإستهزاء فبعد قول بسم الله الرحمن الرحيم (يا أيها الذين أمنوا لا يسخر قوم من قوم عسى ان يكونوا خيراً منهم)صدق الله العظيم (مش عارف إيه الأية المقابلة لها فى الإنجيل)

نتائج الفجوة السياسية:
1-عدم إحترام الناس الكبيرة من قبل الشباب،و عدم العطف على الشباب من قبل الكبار (مين السبب و مين المسبب،كأنك بتسأل إيه أول نقطة فى الدايرة)
2-زيادة الوقفات الإحتجاجية من الطلبات،بعضها مشروع (إعتصام الأطباء) و معظمها غير مشروع
3-عدم العمل و التعلم مما أدى إلى مشاكل إقتصادية و تخلف

الحلول:
1-أخلص فى عملك
2-أجلس مع الاخرين و أفهم ارائهم بإحترام
3-إذا كنت شاب حاور الكبار بإحترام، و إذا كنت كبير حاور الشباب بإحترام
4-ارجع للدين
5-ابحث عن الحقيقة بنفسك و اترك التعصب
6-نفذ كل تلك الحلول و فكر فى حلول جديدة

الخميس، مايو 15، 2014

قهاوى تويتر و نوادى الفيس

(هذا المقال مقدم منمصر أمانة (الأستاذة/هبة بدوى) أعلى قيمة للتقييم هى 10 و أقل قيمة هى 0)

ما أفضل مكان لدراسة المجتمع؟؟
الإجابة:مواقع التواصل الإجتماعى
قبل ما أبدأ فى التقسيمات،نبدأ فى شرح بعض الأساسيات للفيس و تويتر
1-مجموعة أو صفحة (فى الفيس):زى النوادى فى العالم الحقيقى،الكل بيتناقش و بيرد على بعضه
2-هاشتاج (اغلبه فى تويتر):زى القهوة،كله بيتكلم و قليل لما تلاقى حد يرد على التانى

نبدأ التقسيم:
فى المجتمع الحقيقى هناك محترمين و نص نص و سفلة،فى المجتمع الوهمى هناك محترمين و نص نص و سفلة و كلهم معروفين بتويتاتهم و لكل واحد أسلوب تعامل
المحترم تعامله بإحترام،النص نص على حسب موقف كلامه،اما السافل فريح نفسك و أعمل ريبورت سبام (زى كبيرة الأحاوية)

فى المجتمع الحقيقى هناك أغنياء و فقراء،فى الفيس هناك صفح مليانة إعجابات و صفخ بتدور على تبادل إعلانى،فى تويتر هناك أشخاص عندهم متابعيين كتير بيعملوا تبادل متابعين #فولورز_البت_الصينية_و_صاحب_الحفلة_يعملوا_فولو_لبعض و الناس الكحيانة اللى عندها 515 متابع بيكتبو (فولو و النبى و هعملك فولو باك)(عمرى ما عملت كده)

فى المجتمع الحقيقى هناك شرطة و جيش،فى تويتر هناك حسابات مثل (برجاء متابعتها)  سبام على الإخوان حركة دعم بلدنا (هذا الإعلان مجانى و لم يدفع فيه شئ)

فى المجتمع الحقيقى هناك ألطاخ،فى مواقع التواصل فى هاكات زى هاك فيلم حلاوة روح فى الفيس،او الريتويت التلقائى فى تويتر،و قد يصل إلى نشر روابط إباحية على الصفحة سواء الفيس أو تويتر (اسم الهاك ده هو accesses tokens)

فى المجتمع الحقيقى هناك مجاملين و منافقين،فى المجتمع الإلكترونى هناك مجاملين و منافقين و لا يمكن التفريق بينهم،لكن انا متأكد من شخص انه ليس منافق و الحمد لله

فى المجتمع الحقيقى هناك أباء و أمهات،فى المجتمع الإلكترونى هناك أشخاص يمثلون هذا الدور بإمتياز (عددهم كبير فمش هعرف أحصر) و يستحقون الإحترام الذى نعطيه لابائنا و امهاتنا

فى المجتمع الحقيقى هناك سارقين الأموال،فى المجتمع الإلكترونى هناك نوعين
1-اكونتات مزيفة بأسماء بنات و صور إباحية مصنوعة من شباب ذكور
2-اكونتات حقيقية باسماء بنات و صور إباحية لبنت لابسة نقاب (بركاتك يا طاهرة)
و فى النهاية يسرقوا فلوسك بنسبة 95% علشان اتصال وهمى تعمله معاك

فى المجتمع الحقيقى هناك أشخاص مشغولين معظم الوقت،فى المجتمع الإلكترونى بقلق عليهم لأنهم مثل أبى و أمى و اخى و اختى مثل ما وضحت بالأعلى

فى النهاية،اكتشفت حاجة،مستحيل حد يكدب على الناس فى مواقع التواصل الإجتماعى و يقول شخصية غير شخصيته الحقيقية،حتى الشباب اللى بيعمل أكونتات بنات،ده صفته الحقيقية (يستحق لقب بنت مش لقب رجل)

هل تذكرهم؟؟؟

(هذا التحدى مقدم من الأستاذة/شيماء حسنين محمود (بنت الشيخ حسنين محمود حسنين) (اتشرف بإنضمامكم للجروب الإسلامى) اعلى قيمة للتقييم هى 10 و اقل قيمة هى 0)

هسألك سؤال
بتاكل إيه؟؟

قبل ما تقفل المقال و تقول انت مالك،هسألك نفس السؤال بس هغير حرف
بياكل إيه؟؟
فى اعتقادى الخاص،لا شئ
طب إيه رأيك فى أهل سوريا أو أهل فلسطين الشرفاء (مش الخونة)،او كل شخص منكوب؟؟؟؟

قبل ما تقول أنا مالى؟؟،مش حضرتك إنسان و لا أنا غلطان؟
إحنا كبشر ربنا ادانا صفة أسمها الإنسانية،دى بتفرقنا عن الجماد،لكن مع التطور و البغض اللى حصل بيننا،كرهنا الصفة دى عندنا.

قبل ما حد يرد بصورة من أهل الخليج و هما بياكلو رز و فتة و كل ما طابت الأنفس،مع تعليق فى بطونهم نار
معظم (ما لم يكن كل) الدول العربية بتبرع بفلوس لحل مشاكل مجاعة أفريقيا.

صديقى القارئ،صديقتى القارئة
انا لا أطلب منك أن تتبرع لحساب ما سواء بالمال او الطعام او اى شئ
كل ما أطلبه هو ان تتبرع بخمس ثوانى من وقتك كل يوم تقول فيه
(يا رب أفرج نكبة كل منكوب)



(برجاء الرد بإستخدام حساب الفيس و إخبارى نظرا لوجود مشاكل تقنية لا اعلم حلها)

الثلاثاء، مايو 13، 2014

حوارات أهل تويتر

السلام عليكم

(هذا التحدى مقدم من الأستاذ محمود (تحيا مصر)،المطلوب الكلام عن أحاديث تويتر،أقل قيمة لتقييم الموضوع هى صفر أعلى قيمة هى 10)



الحوارات فى تويتر سهلة جدا،و ينفع تتلخص فى:-

1-كلام فى السياسة:-
كاتب التويتة:السيسى جامد جدا و هيكتسح الإنتخابات
الأول:طبعا 100%
الثانى:#تحيا_مصر  #السيسى_رئيسى
الثالث:إزيكم يا جماعة؟؟ (غالباً بيكون انا)
كاتب التويتة:كويس،و أنت عامل إيه فى امتحاناتك (بتفكرونى ليييييييييييه؟؟؟)
الأول:انت قاعد ليه على تويتر،خش ذاكر
انا:و الله أنا فى الباص (اتغيرت حاليا إلى الباص بيسلم عليك)
التانى:طول عمرك فى الباص(ليه محدش واثق فيا؟؟)
و ينتهى الحوار إلى خش ذاكر،انا فى الباص،إمتحاناتك امتى

2-صباح الخير/مساء الخير (نصيحة:بعد الساعة 12 ظهرا قول مساء الخير و بعد 12 نص الليل قول صباح الخير)
كاتب التويتة:(صباح/مساء) الخير يا اهل (كفر/حى/سكان) تويتر الكرام
الأول:إزيك يا باشا
الثانى:حبيب هارتى عامل إيه؟
 الـ150:فين الغدا؟(غالبا تويتة زى دى بتاخد 500 رد،إزاى بتعملوها يإلا هحقد عليكم)
الـ151:هات فلوس و أنا أجيبلك غدا(معظم الوقت أنا)
و ينتهى الحوار بإزيك يا أحمد،امتى الفاينال،خش ذاكر،إلخ إلخ إلخ
  
3-واحد بيرفع أغنية و يعمل منشن للكل (بحب أرفع أغانى نهاد حداد)(أغنية هدى حداد بعت الصورة مش الكلمات دى غلطة)
الأول:واو حلوة الكلمات،ممكن الرابط
انا:هخلص المنشنات و أبعتهالك
الثانى(من منشن تانى):واو حلوة الأغنية ممكن رابط التحميل
انا:طبعا بس ثوانى أخلص المنشن :)))))))))
الثالث:ممكن رابط الأغنية
أنا:حاضر(ينفع اسألك ليه مبتخش جوجل و تدور عليها)؟؟؟؟
(الردود بتوصل ل90 رد بس متبقاش تريند،إزاى تعملوها؟؟؟؟؟)

4-ردود على مقال أسماء و معانى
الأستاذة بنت النيل:ممكن أعرف معنى اسمى
انا:بنت النيل هى فتاة ولدت على ضفتى النيل و أحبته كأنها أباها،فأخبرها بأسراره،و لكنها تضايقت من تصرفات الاخرين و إهانتهم له،فهاجرت و قلبها يتقطع على أبيها

5-أسلم على الناس الكبيرة
أنا:ازيك يا كبير،عامل إيه؟
(بعد 10 الاف سنة)(هو/هى):بخير يا أحمد (فى حالة عدم الرد بقلق،برجاء الرد أيها الصديق العزيز)      

6-صورة حزينة
أنا:إزيك،إيه اللى حصل؟؟؟
كاتب التويتة:مفيش حاجة حصلت،بتقول كده ليه؟؟
أنا:الصورة بتقول
الكاتب:اه،دى لقيتها على الفيس و عجبتنى فرفعتها.


شكرا لقرائتكم
:))))))))))))))))

السبت، مايو 03، 2014

و قررت أمى أن تتعلم تويتر

(هذا المقال هو بمثابة تحدى لى،إبتداءً من الأن سأستمع و سأحاول تنفيذ تحدياتكم،التحدى من الصديق MasterLocalXixi،المطلوب منى إضحاككم بمقال مكتوب باللغة العربية الفصحى،برجاء الرد و كتابة تقيماتكم بحيث أن أعلى قيمة هى 10 و أقل قيمة هى 0.)

فى ليلة ليلاء لم يخرج فيها القمر (فى بدايات شهر رجب)،وبينما أمى تلعب على الحاسب اللوحى (tablet) لعبة تدمير الحلوى (candy crush)،أتى لها هاجس أن تتعلم موقع التغريدات القصيرة تويتر (twitter)،فوعدتها بذلك فى الإجازة،و قررت أخذ نصيحة أهل تويتر.

فلاح كفر الهناودة:هل تحب الحياة؟؟؟

(كنت متوقع أنه سيقول أهلا و سهلا.)

شخصا اخر:لا تفعل،تكفى مراقبة المنزل.

(هنا تذكرت قصة أمى و أختى،عندما قمت بإنشاء حساب لأمى على موقع الفيس بوك (facebook) (نسيته لحسن حظى)،فى ذلك الحين عادت أختى من القاهرة إلى بيتنا بالسويس،و كتبت حالة (status) على الموقع،بعدها بدقائق (على تعبير أختى) اقتحمت أمى الغرفة و أخبرت أختى بالحالة التى كتبتها منذ دقائق،و انهت أختى القصة بالدعاء على.)

أنا (بكل شجاعة):أنا لن أضيفها على حسابى.

شخصا ما:تستطيع الوصول لحسابك بسهولة.

أنا:و لماذا أخترع الإبلاغ؟؟

ذلك الشخص:ستبلغ عن أمك (مع شهقة و ضربة على الصدر).

انا:تضايقنى يوم واحد خير من أن تفضحنى كل يوم.

الشخص:إذن لا تعلم أمك تويتر.

انا:لقد وعدتها للأسف.

طبعا أدركت لاحقاً انا حسابى على تويتر مسجل على الحاسب اللوحى الخاص بها،و أنها التقطت إشارة كافية لتدخل على الإنترنت بإستخدام شبكة الإنترنت اللاسلكية (wi-fi)،و أن كل التويتات تم إلتقاطها (لحسن حظى أنها لم تفتحها،و إلا كانت روحى هى التى تكتب لكم هذا المقال).

الحلول المتوفرة:
  • إنشاء حساب لأمى مع عدم إضافتها لقائمة المتابعين (followers).
  • إنشاء حساب لأمى مع إضافتها لقائمة المتابعين دون أن أعرفها على أصدقاء النت.
  • إنشاء حساب لأمى مع إضافتها لقائمة المتابعين و تعريفها لأصدقائى على النت.
  • إنشاء حساب لأمى مع وضع أمى فى قائمة المحجوبين (blocked).


(منتظر تقيماتكم و تحدياتكم على حسابى الفيس أو تويتر،تجد الروابط أعلى الصفحة على اليسار إذا دخلت من الحاسب)

المزيد من تلك الأسماء الرائعة

على الرغم من أنى كتبت شوية أسماء،إلا أن اصحابى الأعزاء طلبوا منى (من غير تهديد) ان أترجم معانى اسماؤهم (لو مدخلتش على النت يبقى أنا أكيد بذاكر)
طبعا مش محتاج أن أقول أن الأسماء اللى هذكرها محترمها و هما أصحاب كويسين و بحترمهم حتى لو أختلفت معاهم فى الرأى

عاشقة مصر:اسم يدل على الفخر و العزة و الوطنية،فهى تعشق مصر و شعبها،و ستنفذ أى أمر تطلبه مصر أو شعبها
حيث كده بما إنى واحد من الشعب،عايز ربع مليون جنيه أشترى بيهم شاليه على البحر،طب مش هرجع الفلوس
**********************************************************************
(القسم الاتى سياسة إذا أردت أن تتجاوزها فلا بأس بذلك)
دى كانت ثورة سودا:أكيد قصده على 25 يناير،معاك أن هى جابت بلاوى كتير،منهم الإخوان (شديد التطرف الدينى)،و السبكى و قنوات الرقص الشرقى (شديد الإبتعاد عن الدين)،لكن لا زالت دمرت نظام فاسد و هو نظام مبارك،يمكنك أن تقول مبارك لم يكن ظالم،بس معملش حاجة علشان يوقف الظلم
طبعا الشكر للأشاح الذين وقفوا أمام ذلك الظلم فى فترة ال30 عاما لحكم مبارك،فلولاهم لكان حالنا مثل حال دول جنوب أفريقيا
**********************************************************************
ابن أخت تويتر:تصوروا كنت فاكر تويتر عصفورة،ده بقى اللى شرب لبن العصفورة (يا ابن المحظوظة)

الولية أم محمد:لما تقرا الأسم ده،تفتكر بنت معاها سيفين و مطواة،و بتلم الحارة على الراجل اللى مش عاجبها،إحنا أسفين يا صلاح

مروة:ده اسم بشمهندسة،و فخورة بأنها مهندسة،نصيحة لكل اللى هيخش الهندسة،الكلية دى مفيهاش بنات إلا بنات مدنى و عمارة و اتصالات،ده احنا كطلبة كهربا و ميكانيكا بنعدى جنب قسم عمارة نشم هوا

#قروب_التعارف:طب مالها جماعة للتعارف،لازم فذلكة


الخميس، مايو 01، 2014

أسماء و معانى

(هذا المقال تفريغ لضغط بتاع امتحانات الميد ترم اللى جت على دماغى)

تويتر و فيس بوك...معظمنا عنده أكونت فيس بوكى وقليل قوى عنده تويتر

طبعا الشعب المصرى لازم يحط التاتش بتاعه فى أى حاجة يخشها،ختى لو حط التاتش فى اسم الأكونت

نبدأ بأهل تويتر و نتعرف على أسماؤهم الجميلة
أ-أسماء بسيطة
نجوى حسين،مجدى عفيفى،...أسماء عادية مفيهاش التاتش

ب-أسماء أنثوية
المرأة تاج مصر:أسم ملكى تحس بالعزة و الفخر،طبعا فالمرأة هى الوالدة الحنون و الأخت الرائعة و الزوجة المصونة
قمر تويتر:  تحس أن هى بتقول (يا تويتر أتهد ما عليك قدى)
كبيرة الأحاوية:أسحب كلامى عن المرأة،ده انا بكره الكلمة دى تقومى تحلى نفسك كبيرة
ج-التاتش المصرى
شخصا ما:أنت ناسى أسمك يا حبيبى، ما تطلع بطاقتك الجميلة و افتكر أسمك

مين المتشرد ده؟؟
دى صورتك...خبى العار...ده انت شبه المتشردين
أستنى لحظة....ده أنا(معلش الواحد اللى فى هندسة بينسى أسمه و ينسى هو مين)

فلاح كفر الهناودة ده عشم أهل كفر تويتر برنجة و فسيخ و لتر بيبسى لكل مواطن تويترى يوم شم النسيم
سارة عاشقة الملوخية...عايزها بالأرانب و لا باللحمة؟؟؟
احمد بيضرب بتنجان:(ينفع اسم تويترى)

نيجى لأسماء الهاشتاجات الرائعة
#حركة_بلدنا للأستاذة (هى بالفعل مدرسة) جيهان جبر
#ماذا_ستفعل_بعد_نجاح_الثورة_الإسلامية معظم الناس أتكلمت عن بناء كباريه بعد حوار مد تصريح الكباريهات،عن نفسى هطبق اللى بتعمله تركيا زى الحشيش و الخمرة و اللى أنت عارفه (*_^)
#ارجوك_أعطنى_هذا_الفولو تلاقى واحد كاتب فيه (و النبى الله يخليك،انا عندى 335 فولورز عايز أقفلهم للألف،ادينى فولو و تاخد الباك هدية)

نيجى لصفحات الفيس
لطخ على الكابلز ممكن تكسب مزة:هو انت هتكسب بوكس فى عينك مش مزة
البشمهندز أبو حميض:مهندس و نسى العربى من اللى بياخده فى هندسة،أعذروهم فهم غلابة
سماعتك فى جيبك ترمومترك فى إيديك:مش ناقص غير أن هى تكمل و تقول أى عيان يشتكى ادى الترمومتر فى عينه
(ملايكة و لا مش ملايكة رحمة يا متعلمين يا بتوع المدراس)
------------------------------------------------------------------------------------------------
شوية جد
1-المقال حاسس انه مش كوميدى أوى معاك فى دى،المقال للأسف اتسوى بره الورقة فمعرفتش افتكر المقال
2-نهنئ الأستاذ مجدى عفيفى بعودته لتويتر بعد إصابته بتعب بسيط
3-انا  1 يوليو 1997 مش 1973 فمبحبش كلمة أستاذ،دى للسادة الأكبر منى
4-نظرا لإدمانى للنت فقررت أن أضيق الخناق على نفسى و أقلل الدخول و من ثم هرفع كل أسبوع اغنية لفيروز (لو رفعت كل يوم يبقى انا مش بذاكر وقتها نبهونى)
5-فى مبادرة عملتها الحملة الإنتخابية للسيسى أسمها فكرتى من أجل الإستماع لصوت الشباب فى حل المشاكل
6-أشكركم أيها الأصدقاء الأعزاء